അഡ്ലെയ്ഡ്: ഓസ്ട്രേലിയയിലെ അഡ്ലെയ്ഡില് ഭാര്യയെ കൊലപ്പെടുത്തിയ കേസില് ഇന്ത്യന് വംശജനായ വിക്രാന്ത് താക്കൂര് (34) കോടതിയില് കുറ്റസമ്മതം നടത്തിയെങ്കിലും നിയമപരമായി കുറ്റം ഏറ്റെടുക്കാന് വിസമ്മതിച്ചു.
നിയമപരമായ അര്ത്ഥത്തിലുള്ള 'കൊലപാതകം' എന്ന കുറ്റമാണ് അദ്ദേഹം നിഷേധിച്ചത്. ആസൂത്രിതമായ കൊലപാതകമല്ല നടന്നതെന്ന വാദത്തിലൂന്നിയാണ് അദ്ദേഹം മൊഴി നല്കിയത്.
കഴിഞ്ഞ വര്ഷം ഡിസംബറില് അഡ്ലെയ്ഡിലെ പാരലോവിയിലുള്ള വസതിയിലാണ് വിക്രാന്ത് താക്കൂറിന്റെ ഭാര്യ സുപ്രിയ താക്കൂര് കൊല്ലപ്പെട്ടത്. അഡ്ലയ്ഡ് മജിസ്ട്രേറ്റ് കോടതിയില് ഹാജരാക്കിയപ്പോഴാണ് ഭാര്യയുടെ മരണത്തിന് താനാണ് ഉത്തരവാദിയെന്ന് വിക്രാന്ത് സമ്മതിച്ചത്. എന്നാല്, കൊലപാതകക്കുറ്റത്തിന് പകരം 'മനപ്പൂര്വമല്ലാത്ത നരഹത്യ' എന്ന ഗണത്തില് പെടുത്താവുന്ന കുറ്റമേ താന് ചെയ്തിട്ടുള്ളൂ എന്നാണ് ഇദ്ദേഹത്തിന്റെ നിലപാട്.
വിക്രാന്തിന്റെ ഭാഗികമായ കുറ്റസമ്മതം പ്രോസിക്യൂഷന് അംഗീകരിച്ചിട്ടില്ല. അതിനാല് കേസില് കൂടുതല് വിചാരണ നടത്താന് കോടതി ഉത്തരവിട്ടു. ദമ്പതികള്ക്ക് രണ്ട് ചെറിയ കുട്ടികളുണ്ട്. സംഭവസമയത്ത് കുട്ടികള് വീട്ടിലുണ്ടായിരുന്നോ എന്നത് സംബന്ധിച്ച് അന്വേഷണം നടക്കുകയാണ്. നിലവില് റിമാന്ഡിലുള്ള വിക്രാന്ത് താക്കൂറിനെ ഏപ്രിലില് കോടതിയില് ഹാജരാക്കും.
E-paper LOGIN
LOGIN